بۆ بەڕێزان مام جەلال تاڵەبانی سەرۆك كۆماری ئێراقی فیدڕاڵ
كاك مەسعود بارزانی سەرۆكی هەرێمی كوردستان
هەروەك ئاگادارن رێژیمی كۆماری ئیسلامی ئێران بە بیانووی جۆراوجۆر وەك تیرۆر یا ئەندامبوون لە حیزبە بەرهەڵستكارەكان و دژبەری ئێران و چالاكوانانی سیاسی نەتەوەییمان، هاووڵاتیانی كوردی دانیشتووی رۆژهەڵاتی كوردستان دەستبەسەر و زیندانی و ئەشكەنجە ئەدرێن و حوكمی ئێعدام و لەسێدارەدانیان بەسەردا دەسەپێنن كە ئەوە پێچەوانەی بنەماكانی مافی مرۆڤە.
هەر لەم پێوەندییەدا دوو هاووڵاتی كوردی خەڵكی شاری مەریوان، بە تۆمەتی كوشتن و تیرۆری كوڕی ئیمام جومعەی ئەم شارە بە ناوەكانی زانیار مورادی لە ١ی ئەگۆستی ٢٠٠٩ و لوقمان مورادی لە ١٧ی ئۆکتۆبری ٢٠٠٩ لە لایەن هێزەکانی ئیتڵاعاتی لە شاری مەریوان قۆڵبه‌ست کران و له ٢٢ی دێسەمبەری ٢٠١٠ لە لایەن لقی (١٥)ی دادگای شۆڕشی ئیسلامی لە شاری تاران، بەتۆمەتی موحارب سزای ئیعدامیان به سه‌ر دا سه‌پا بە تۆمەتی کوشتنی کوڕی ئیمام جومعەی مەریوان.
ئەو دوو گەنجە كوردە لەژێر قورسترین شێوازەكانی ئەشكەنجەدا دانیان بە كوشتنی كوڕی ئیمام جومعەی ئەوشارە داناوە، كە تەنانەت ئیمام جومعەی شاری مەریوان هێزە ئەمنییەكانی شاری مەریوانی ئاگادار كردۆتەوە كەوا نایهەوێ لەكاتی جێبەجێكردنی حوكمی ئێعدامی ئەو دوو گەنجەدا لەوێ ئامادەبێ بەهۆی ئەوەیكە گومانی هەیە لەوەیكە ئەو دوو گەنجە كوردە كوڕەكەی ئەویان كوشتبێ.
بۆ ئاگاداری بەڕێزتان پێشتر ڕێکخراوی لێبۆردنی نێونەتەوەیی بەدەرکردنی لێدوانێکی بەپەلە سەبارەت بەڕەوشی ئەو دوو گیراوە کوردە ڕایگەیاندبوو:
ئەو دوو گیراوە بۆ ماوەی ٩ مانگ لە لایەن ئیدارەی ئیتلاعاتەوە دەستبەسەر بوون، بێ ئەوەی لەو ماوەیە دا هیچ تۆمەتێکی کوشتنیان بخرێتە پاڵ. ئەوان چەندین جار بۆ گرتووخانەی جیاواز ڕاگوێزراون و سەرئەنجام لە مانگی دێسەمبەری ٢٠١٠ دا بۆ بەندی ٤ی گرتووخانەی رەجایی شاری کەرەج گوازرانەوە.
رێکخراوی لێبوردنی نێونه‌ته‌وه‌یی بە ئاماژەدان بە نامەیەکی لوقمان و زانیاری مورادی ڕایگەیاندبوو: ئه‌و دوو گیراوه کورده، لە ماوەی دەستبەسەربوونیان دا لە گرتووخانەکانی وەزارەتی ئیتلاعات، ماوەی ٢٥ ڕۆژ ئەشکەنجە کراون، گوشاریان لە سەر بووە و هەڕەشەی دەستدرێژی سێکسیان لێکراوە تا "دان" بەوە دابنێن کە کەسێکیان کووشتووە. لەو ماوەیە دا ئەو دوو گیراوە، لە دەستپێڕاگەیشتن بە خزمەتی پزیشکی پێویست بێبەش بوونە.
سەپاندنی سزای لەسێدارەدان و پشتڕاستکردنەوەی لە لایەن دادگای پێداچوونەوە لە ڕێکەوتی ١٥٧ ژانویەی ٢٠١٠ لە کاتێکدایە کە "زانیار مورادی" لە کاتی دەستبەسەر کردنیدا تەمەنی تەنیا ١٧ ساڵ بووە و ئەمە بە پێچەوانەی ئەو کونوانسیۆنە نێونەتەوەییەکانە کە رژیمی ئێران واژۆی کردووە، سەبارەت بە پاراستنی مافی نەوجەوانان.
ئێمە وەك كەمپەینی بەرگری لە زیندانیە سیاسی و مەدەنيیەكانی ئێران و كوردستان داوا لە بەڕێزانتان دەكەین كەوا هەموو هەوڵێكی خۆتان بخەنە گەڕ بۆ بەرگری كردن لەو دوو گەنجە كوردەی دانیشتوی رۆژهەڵاتی كوردستان و پاراستنیان لە مەترسی ئێعدام و كوشتن.
بە سوپاسەوە
كەمپەینی بەرگری لە زیندانی سياسى و مەدەنى
26/1-2012
دررزيمى كه اصلاباوربه حقوق انسانهاندارد كمبين جه معنى ميبخشد
پاسخحذفعلاج حقوق بشردرايران وكردستان فقط سقوط اين نظام فاشيست است